కేటీఆర్ సాయం కోరిన పేద క్రీడాకారిణి..స్పందించిన మంత్రి

ఓ పేద క్రీడాకారిణికి అండగా నిలిచారు ఐటీ, మున్సిపల్ శాఖ మంత్రి కేటీఆర్ . ట్విట్టర్లో తనను సాయం కోరిన ఓ పేద క్రీడాకారిణికి అండగా నిలిచారు. నల్గొండ జిల్లా చండూర్ మండలం బంగారి గడ్డ గ్రామానికి చెందిన అంతర్జాతీయ ఫెన్సింగ్ క్రీడాకారిణి నజియా ఆటలో రాణిస్తోంది. హకీంపేటలోని తెలంగాణ రాష్ట్ర ప్రభుత్వ క్రీడా పాఠశాల హకీంపేట్ లో ఇంటర్ పూర్తి చేసిన 17 ఏళ్ల నజియా ఇటీవల లండన్ లో జరిగిన కామన్వెల్త్ ఫెన్సింగ్ చాంపియన్ షిప్ లో కాంస్య పతకం, టీమ్ విభాగంలో మరో కాంస్యం గెలిచింది. నజియా తండ్రి ఆర్టీసీ కండక్టర్ గా పని చేస్తున్నాడు. చిన్న జీతంతో ముగ్గురు పిల్లలను పోషించడం ఆయనకు కష్టం అవుతోంది. ఈ విషయాన్ని ట్విట్టర్ లో మంత్రి కేటీఆర్ దృష్టికి తీసుకెళ్లిన నదియా తనకు ఆర్థిక సాయం చేయాలని కోరింది. దీనికి కేటీఆర్ స్పందించారు. మంత్రి ఆదేశాల మేరకు తెలంగాణ క్రీడా ప్రాధికార సంస్థ చైర్మన్ అల్లీపురం వెంకటేశ్వర్ రెడ్డి, రాష్ట్ర ఫెన్సింగ్ సంఘం అధ్యక్షుడు మర్రి రాజశేఖర్ రెడ్డి, ఎమ్మెల్యే కోరుకంటి చందర్ నజియా ఇంటికి వెళ్లి స్పోర్ట్స్ కిట్ ను, రూ. 50 వేల నగదు అందించారు. దాంతో కేటీఆర్ పై ప్రశంసల జల్లు కురుస్తోంది. సోషల్ మీడియాలో నిత్యం యాక్టీవ్ గా ఉంటారు కేటీఆర్ ..సాయమడిగిన వారికి వెంటనే స్పందిస్తున్న తీరు అద్భుతమని కొనియాడుతున్నారు.