గుజరాత్ ముఖ్యమంత్రి పదవికి విజయ్ రూపానీ రాజీనామా చేసిన క్రమంలో తదుపరి సీఎం ఎవరనే విషయం సర్వత్రా ఉత్కంఠ రేపుతోంది. వచ్చే ఏడాది అసెంబ్లీ ఎన్నికలు జరగనున్న వేళ.. రూపానీ రాజీనామా చర్చనీయాంశమైంది. హ్మదాబాద్ సర్దార్ధామ్ భవన్ ప్రారంభోత్సవ కార్యక్రమంలో ప్రధాని మోదీ వర్చువల్గా పాల్గొనగా.. రూపానీ కూడా హాజరయ్యారు. కార్యక్రమం ముగిసిన కొద్దిసేపటికే రూపానీ రాజీనామా చేయడం గమనార్హం. దీంతో తదుపరి ముఖ్యమంత్రి ఎవరనేదానిపై ఉత్కంఠ నెలకొంది. ఇప్పటికే పార్టీ నాయకులతో సీనియర్ నేతలు సమావేశమైనట్లు తెలుస్తోంది. ఈ క్రమంలో పలువురి పేర్లును అధిష్ఠానం పరిశీలిస్తోంది. 2022 డిసెంబర్లో అసెంబ్లీ ఎన్నికలు జరగనున్న నేపథ్యంలో పటేల్ సామాజిక వర్గానికి చెందిన నేతకు సీఎం పదవి అప్పగించాలని బీజేపీ నాయకత్వం భావిస్తున్నట్లు సమాచారం. సీఎం రేసులో ముగ్గురు పేర్లు ప్రముఖంగా వినిపిస్తున్నాయి. రాష్ట్ర డిప్యూటీ నితిన్ పటేల్, కేంద్ర మంత్రులు పురుషోత్తమ్ రుపాలా, మాన్సుఖ్ మాండవియాలు సీఎం పదవి రేసులో ఉన్నారు. కొత్త ముఖ్యమంత్రి పేరును ఒకటి లేదా రెండు రోజుల్లో ప్రకటించే అవకాశం ఉందని పార్టీ వర్గాలు తెలిపాయి.
ఇది కూడా చదవండిః గుజరాత్ సీఎం విజయ్ రూపానీ రాజీనామా