– ఇంటర్నెట్ డెస్క్, ఆంధ్రప్రభ
తెలంగాణలోని మునుగోడు అసెంబ్లీ స్థానానికి జరిగిన ఉప ఎన్నికల్లో రికార్డు స్థాయిలో 93.13 శాతం పోలింగ్ నమోదైంది. కొన్ని పోలింగ్ కేంద్రాల్లో రాత్రి 10.30 గంటల వరకు ఓటింగ్‌ జరిగింది. దీనికి సంబంధించి శుక్రవారం ఉదయం తుది పోలింగ్ లెక్కలను అధికారులు వెల్లడించారు. మొత్తం 2,41,805 మంది ఓటర్లలో 2,25,192 మంది తమ ఓటు హక్కును వినియోగించుకున్నారు. ఈసారి మొత్తం 47 మంది అభ్యర్థులు బరిలో ఉన్నప్పటికీ ప్రధాన పోటీ టీఆర్ఎస్, బీజేపీ, కాంగ్రెస్ పార్టీల మధ్య జరిగిందన్నది స్పష్టమైంది.
ఇక.. సిట్టింగ్ ఎమ్మెల్యే కోమటిరెడ్డి రాజగోపాల్ రెడ్డి ఆగస్టులో బీజేపీలో చేరేందుకు కాంగ్రెస్ పార్టీకి రాజీనామా చేయడంతో ఉప ఎన్నిక అనివార్యమైంది. ఈసారి బీజేపీ టికెట్‌పై రాజగోపాల్రెడ్డి పోటీ చేశారు. 2018లో రాజగోపాల్రెడ్డి చేతిలో ఓడిపోయిన మాజీ ఎమ్మెల్యే కూసుకుంట్ల ప్రభాకర్‌రెడ్డిని టీఆర్ఎస్ రంగంలోకి దింపింది. కాగా, మాజీ ఎంపీ పాల్వాయి గోవర్ధన్‌రెడ్డి కుమార్తె పాల్వాయి స్రవంతిరెడ్డిని కాంగ్రెస్ తరపున బరిలోకి దింపింది. ఈసారి మాత్రం నల్లగొండ జిల్లాలో బలమైన కేడర్ను కలిగి ఉన్న వామపక్ష పార్టీలు సీపీఐ, సీపీఎం టీఆర్ఎస్కు మద్దతు తెలిపాయి.
ఓట్ల లెక్కింపు సందర్భంగా హైడ్రామా..
కౌంటింగ్ సందర్భంగా ఇవ్వాల (ఆదివారం) కొద్దిసేపు హైడ్రామా నెలకొంది. మొదటి రౌండ్లో టీఆర్ఎస్కు ఆధిక్యం వచ్చింది. ఆ తర్వాత రెండు, మూడు రౌండ్లలో బీజేపీ అభ్యర్థికి స్వల్ప ఆధిక్యత వచ్చింది. కాగా, అప్పటికే బీజేపీ అభ్యర్థి గెలుపుదిశగా వెళ్తున్నారని, 1100 మెజారిటీతో దూసుకెళ్తున్నట్టు కొన్ని టీవీ చానళ్లలో ప్రచారం జరిగింది. ఆ తర్వాత నాలుగో రౌండ్ ప్రకటన సమయంలో కాస్త ఆలస్యం కావడంతో బీజేపీ లీడర్లు, కేంద్ర మంత్రులు ఎన్నికల సంఘంపై ఆరోపణలు చేశారు.
కావాలనే ఎలక్షన్ కౌంటింగ్ని ప్రకటించడం లేదని, బీజేపీ ఆధిక్యం వచ్చినప్పుడు ఆపేస్తున్నారనే వాదనలు తీసుకొచ్చారు. దీంతో రంగంలోకి వచ్చిన రాష్ట్ర ఎన్నికల అధికారి ఎక్కువ మంది అభ్యర్థులు పోటీలో ఉండడం, కేంద్ర ఎన్నికల సంఘం నుంచి వచ్చిన అబ్జర్వర్ల వల్ల కాస్త ఆలస్యం అవుతోందని వివరించారు. ఇక.. అప్పటి నుంచి ప్రతి రౌండ్లోనూ ఎట్లాంటి ఆటంకాలు జరగకుండా ఫలితాలు వెల్లడించారు.
కాగా, ప్రతి రౌండ్లోనూ టీఆర్ఎస్ ఆధిక్యత కనబరుస్తూ వచ్చింది. చివరికి బీజేపీ అభ్యర్థి రాజగోపాల్రెడ్డి (86,697) మీద టీఆర్ఎస్ అభ్యర్థి కూసుకుంట్ల ప్రభాకర్ రెడ్డి (97,006) ఓట్లు సాధించి 10,309 ఓట్ల మెజార్టీతో విజయం సాధించారు. దీంతో తెలంగాణ వ్యాప్తంగా టీఆర్ఎస్ శ్రేణులు సంబురాలు చేసుకుంటున్నాయి. పటాకులు కాలుస్తూ, స్వీట్లు తినిపించుకుంటూ సంబురాల్లో మునిగి తేలుతున్నారు.
