సబ్ ఇన్స్పెక్టర్ల రాత పరీక్షలో అవకతవకలు జరిగాయన్న ఆరోపణలపై ఇవ్వాల (మంగళవారం) సీబీఐ పలు ప్రాంతాల్లో సోదాలు నిర్వహించింది. జమ్మూ కాశ్మీర్ పోలీస్ ఫోర్స్ లో సబ్-ఇన్‌స్పెక్టర్ పోస్ట్ కోసం అభ్యర్థులు రూ. 20 లక్షల నుండి రూ. 30 లక్షల వరకు లంచంగా చెల్లించారన్న దానిపై కేసు నమోదు అయ్యింది. దీనిపై సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) దర్యాప్తు చేస్తోంది. అయితే.. అభ్యర్థులు మొత్తం అమౌంట్ చెల్లించిన తర్వాత పరీక్షలకు ముందే వారికి ప్రశ్నపత్రాలను అందజేసినట్లు అధికారుల పరిశీలనలో తెలిసింది.
మంగళవారం ఈ కేసులో నిందితుల ఇళ్లల్లో సీబీఐ బృందం సోదాలు నిర్వహించింది.. హర్యానాలో కొంతమంది వ్యక్తులు, జమ్ము, కాశ్మీర్లో కొంతమంది ఉపాధ్యాయులు, CRPFలో పనిచేసిన వారు, రిటైర్డ్ సిబ్బందితో పాటు ఇంకొంతమంది అధికారులు ఈ రాకెట్‌ను నడుపుతున్నట్లు కనుగొన్నారు. కాగా, నాలుగు రాష్ట్రాల్లోని 36 ప్రాంతాల్లో సీబీఐ ఇవ్వాల సోదాలు నిర్వహించిందని అధికారులు తెలిపారు.
జమ్మూ, శ్రీనగర్, కర్నాల్, మహేందర్‌గఢ్, రేవారీ, గాంధీధామ్, ఢిల్లీ, ఘజియాబాద్, బెంగళూరులోని అనుమానితుల ఇండ్లు, ఆఫీసులు, జమ్ము కాశ్మీర్ సర్వీస్ సెలక్షన్ బోర్డు (JKSSB) మాజీ ఛైర్మన్ ఖలీద్ జహంగీర్, అప్పటి పరీక్షల నియంత్రణాధికారి అశోక్ కుమార్‌ల ఇళ్లల్లో ఈ సోదాలు జరిగాయి. సోదాల్లో ఇప్పటివరకు నేరారోపణ పత్రాలు, డిజిటల్ ఆధారాలు లభించాయని సీబీఐ అధికారులు తెలిపారు. J&K పోలీస్‌లో సబ్-ఇన్స్పెక్టర్ల పోస్టుల కోసం రాత పరీక్షలో అవకతవకల ఆరోపణలపై 33 మంది నిందితులపై ప్రభుత్వం అభ్యర్థన మేరకు ఆగస్టు 3న కేసు నమోదు అయ్యింది.
అయితే.. జమ్మూ, రాజౌరి, సాంబా జిల్లాల నుండి పరీక్షలు రాసి సబ్ ఇన్స్పెక్టర్లుగా ఎంపికైన అభ్యర్థుల్లో అధిక శాతం ఈ జిల్లాల నుంచే ఉన్నారని విచారణ కమిటీ కనుగొంది. బెంగళూరుకు చెందిన ప్రైవేట్ కంపెనీకి ప్రశ్నపత్రాన్ని తయారు చేసే పనిని అప్పగించడంలో జమ్ము కాశ్మీర్ సర్వీస్ సెలక్షన్ బోర్డు (JKSSB) నిబంధనలను ఉల్లంఘించినట్లు ఆరోపణలు వచ్చాయని సీబీఐ తెలిపింది.