బాణ‌సంచాతో వెళ్తున్న ఈ-రిక్షాలో పేలుడు.. ఒక‌రు మృతి

ఈ-రిక్షాలో బాణ‌సంచా నింపి తీసుకెళ్తుండ‌గా ఒక్క‌సారిగా రిక్షా పేలింది. ఈ ఘ‌ట‌న‌లో ఒక‌రు మృతి చెందారు.మ‌రొక‌రు తీవ్రంగా గాయ‌ప‌డ్డారు. ఈ ప్ర‌మాదం గ్రేట‌ర్ నోయిదాలో జ‌రిగింది. నోయిడాలోని దాద్రీలో రిక్షా నడిపే పప్పు, అతని సహాయకుడు సల్మాన్.. బాణసంచా నింపిన ఈ-రిక్షాను తీసుకెళ్తుండగా ప్రమాదం జరిగింది. స్థానికంగా జరిగే జగన్నాథ యాత్రలో కొందరు పటాసులు కాల్చారు. ఆ సమయంలో కొన్ని ఎగిరివచ్చి ఈ-రిక్షాలోని పటాసులపై పడ్డాయి. దాంతో ఒక్కసారిగా రిక్షా పేలిపోయింది. ఎలక్ట్రిక్ వాహనం కావడం, క్రాకర్లు ఎక్కువగా ఉండటంతో బాంబు పేలినట్లుగా కనిపించింది. ఈ ఘటనలో పప్పు, సల్మాన్ తీవ్ర గాయపడ్డారని, వారిని దగ్గర్లో ఉన్న ఆసుపత్రికి తరలించగా చికిత్స పొందుతు సల్మాన్ మరణించాడని పోలీసులు తెలిపారు. ఈ సంఘటన అంతా పక్కనే ఉన్న సీసీ కెమెరాలో రికార్డయింది. ఒక్కసారిగా పేలుడు జరగడంతో ఆ ప్రాంతమంతా దట్టమైన పొగతో కమ్ముకుపోయింది. ఏమైందో తెలియక చుట్టుపక్కల వారు పరుగులు తీశారు. పేలుడుకు ముందు రిక్షాలో ఇద్దరు ఉండటం కనిపించింది. పటాసులన్నీ పక్క దుకాణాలపై చెల్లాచెదరుగా పడ్డాయి. దీనికి సంబంధించిన వీడియో సోషల్ మీడియాలో వైరల్ అవుతోంది.