భారతీ ఎయిర్టెల్ హైదరాబాద్, ఢిల్లీ, ముంబై, చెన్నై, బెంగళూరు, సిలిగురి, నాగ్‌పూర్, వారణాసితో సహా ఇతర ఎంపిక చేసిన నగరాల్లో 5G సేవలను ప్రారంభించింది. కంపెనీ తన నెట్‌వర్క్ ను నిర్మించడం.. రోల్ అవుట్‌ను పూర్తి చేయడంతో ఈ నగరాల్లోని కస్టమర్‌లు దశలవారీగా 5G సేవలను పొందుతారని తెలిపింది. 5G స్మార్ట్ ఫోన్‌లను కలిగి ఉన్న వినియోగదారులు రోల్‌అవుట్ మరింత విస్తృతమయ్యే వరకు వారి ప్రస్తుత డేటా ప్లాన్‌లలో Airtel 5G ప్లస్ సేవలను యాక్సెస్ చేయవచ్చు.
ఎయిర్టెల్ 5G ప్లస్ 20 నుండి 30 రెట్లు అధిక వేగం, మెరుగైన వాయిస్ అనుభవం.. వేగవంతమైన కాల్ కనెక్షన్‌ని అందజేస్తుందని పేర్కొంది. భారత టెలికాం విప్లవంలో ఎయిర్టెల్ 27 సంవత్సరాలుగా ముందంజలో ఉందని, తమ కస్టమర్లకు ఉత్తమమైన అనుభవాన్ని అందించడానికి అత్యుత్తమ నెట్‌వర్క్ ను రూపొందించినందున ఈ రోజు తమ ప్రయాణంలో మరో మెట్టు సాధించినట్టు భారతీ ఎయిర్టెల్ ఎండీ, సీఈవో గోపాల్ మిట్టల్ అన్నారు. 5G హ్యాండ్‌సెట్ కలిగి ఉన్న కస్టమర్లకు ప్రస్తుత తమ సిమ్‌ పని చేస్తుందన్నారు.
5G హై డెఫినిషన్ వీడియో స్ట్రీమింగ్, గేమింగ్, మల్టిపుల్ చాటింగ్, ఫోటోల ఇన్‌స్టంట్ అప్‌లోడ్, మరిన్నింటిని అనుమతిస్తుంది. ఇది విద్య, వైద్యం, తయారీ, వ్యవసాయం, మొబిలిటీ, లాజిస్టిక్స్‌లో విప్లవాత్మక మార్పులు తీసుకురానుంది. గత ఏడాది కాలంలో ఎయిర్టెల్ హైదరాబాద్‌లో భారతదేశపు మొట్టమొదటి ప్రత్యక్ష 5G నెట్‌వర్క్, మొదటి 5G పవర్డ్ హోలోగ్రామ్, 5G కనెక్ట్ చేయబడిన అంబులెన్స్, తయారీ ఉత్పాదకతను పెంచడానికి బాష్‌తో భారతదేశపు మొదటి ప్రైవేట్ 5G నెట్‌వర్క్ తో సహా అనేక 5G వినియోగ కేసులను ప్రదర్శించింది.