బీసీసీఐ దేశవాళీ క్రికెట్‌లో కొత్త రూల్‌ను ప్రవేశ పెట్టనుంది. వచ్చే నెలలో ప్రారంభం కానున్న సయ్యద్‌ ముస్తాక్‌ అలీ టీ 20 ట్రోఫి నుంచి ” ఇంపాక్ట్‌ ప్లేయర్‌’ అనే నిబంధనను అమల్లోకి తేనుంది. ఇది అమల్లోకి వస్తే ఇన్నింగ్స్‌ మధ్యలో ఆటగాడిని మార్చుకునే వెసులుబాటు లభిస్తుంది.
ఇంపాక్ట్‌ ప్లేయర్‌ రూల్‌ ప్రకారం.. ఇన్నింగ్స్‌ ప్రారంభం అయ్యాక 14 ఓవర్లలోపు ఇరు జట్లు ఒక్కో ఆటగాడిని మార్చుకునే
అవకాశం ఉంటుంది. సాధారణంగా మ్యాచ్‌ మధ్యలో ఆటగాడికి గాయమైనా లేక అనారోగ్యం బారిన పడినా అతడి స్థానంలో మరో ఆటగాడు సబ్‌ స్టిట్యూట్‌ విధానం ద్వారా బరిలోకి దిగుతాడు. ఇక్కడ సబ్‌ స్టిట్యూట్‌గా వచ్చిన ఆటగాడు కేవలం ఫీల్డింగ్‌ చేయాల్సి ఉంటుంది. అదే ఇంపాక్ట్‌ ప్లేయర్‌ రూల్‌ ప్రకారం అయితే బౌలింగ్‌ చేసే జట్టులో ఇన్నింగ్స్‌ 14 ఓవర్లలోపు ఆటగాడు గాయపడినా లేదా మ్యాచ్‌ అప్పటి స్థితులను ఆధారంగా ఓ ఆటగాడిని మార్చుకోవాలని భావించినా ఓవర్‌ ముగిశాక కెప్టెన్‌ హెడ్‌ కోచ్‌, మేనేజర్‌లలో ఎవరో ఒకరు ఫీల్డ్‌ అంపైర్‌ లేదా ఫోర్త్‌ అంపైర్‌కు సమాచారం అందిస్తే ఆటగాడిని మార్చుకునే వెసులుబాటు ఉంటుంది.
ఇంపాక్ట్‌ ప్లేయర్‌గా వచ్చిన ఆటగాడు బ్యాటింగ్‌తో పాటు 4 ఓవర్ల పాటు బౌలింగ్‌ కూడా చేయవచ్చు. అదే బ్యాటింగ్‌ చేసే జట్టు వికెట్‌ పడ్డాక ఇన్నింగ్స్‌ బ్రేక్‌ సమయంలో ఇంపాక్ట్‌ ప్లేయర్‌ గురించి అంపైర్‌కు సమాచారం అందిస్తే ఆటగాడిని మార్చుకునే వెసులుబాటు ఉంటుంది. ఇందుకోసం ఇరు జట్లు టాస్‌ సమయంలో ప్లేయింగ్‌ ఎలెవెన్‌తో బాటు నలుగురు ఇంపాక్ట్‌ ప్లేయర్స్‌ జాబితాను సమర్పించాల్సి ఉంటుంది. తప్పనిసరి కాని ఈ ఇంపాక్ట్‌ ప్లేయర్‌ అప్షన్‌ ప్రకారం ఒక్కసారి జట్టును వీడిన ఆటగాడు తిరిగి జట్టులోకి వచ్చే అవకాశం ఉండదు. మ్యాచ్‌ ముగిసే వరకు ఇదే పరిస్థితి కొనసాగుతుంది.
ప్రస్తుతం బిగ్‌ బాష్‌ లీగ్‌లో మాత్రమే అమల్లో ఉన్న ఈ రూల్‌ త్వరలో సయ్యద్‌ ముస్తాక్‌ అలీ టి 20 టోర్నీల్లోనూ అమల్లోకి రానుంది. ఇంపాక్ట్‌ ప్లేయర్‌ రూల్‌ను వచ్చే సీజన్‌ నుంచి ఐపిఎల్‌లో సైతం ప్రవేశపెట్టాలని బీసీసీఐ యోచిస్తుంది. క్రికెట్‌తో పాటు ఇంపాక్ట్‌ ప్లేయర్‌ ఆప్షన్‌ ఫుట్‌బాల్‌, రగ్బీ, బాస్కెట్‌ బాల్‌ వంటి క్రీడల్లో కూడా అమల్లో ఉంది. ఈ రూల్‌ అమల్లోకి వస్తే క్రికెట్‌ రసవత్తరంగా మారనుందని విశ్లేషకులు భావిస్తున్నారు.