భారత టెస్ట్‌ జట్టు ఆటగాడు చతేశ్వర్‌ పుజారా ఐదేళ్ల తర్వాత అర్జున అవార్డు అందుకున్నాడు. కేంద్ర క్రీడల మంత్రి అనురాగ్‌ ఠాగూర్‌ చేతుల మీదుగా పూజారా ఈ అవార్డు అందుకున్నాడు. 2017లో పూజారాకు కేంద్ర ప్రభుత్వం అర్జున అవార్డును ప్రకటించింది. అయితే ఆ ఏడాది అతను అవార్డు వేడుకకు హాజరు కాలేదు. ఐదేళ్ల తర్వాత అర్జున అవార్డు అందుకున్న పూజారా ఫోటోను ట్విట్టర్‌లో పోస్ట్‌ చేశాడు.
” ఆలస్యం అయినా కూడా నాకు సన్మానం చేసి అవార్డు ప్రదానం చేసినందుకు బీసీసీఐ, కేంద్ర మంత్రి అనురాగ్‌ ఠాకూర్‌కి ధన్యవాదాలు. తీరిక లేని క్రికెట్‌ షెడ్యూల్‌ కారణంగా ఆ ఏడాది అవార్డు అందుకోలేకపోయాను. అవార్డు వచ్చినందుకు చాలా ఆనందంగా, గర్వంగా ఉంది” అంటూ పూజారా ట్వీట్‌ చేశాడు.
రాహుల్‌ ద్రవిడ్‌ తర్వాత భారత టెస్ట్‌ జట్టుకు మరో వాల్‌గా పుజారా పేరు తెచ్చుకున్నాడు. ఈ మధ్యే కౌంటీ క్రికెట్‌లో అదరగొట్టిన పూజారా బంగ్లాదేశ్‌ పర్యటనకు వెళుతున్న భారత టెస్ట్‌ జట్టుకు పూజారా ఎంపికయ్యాడు. టీమిండియా , బంగ్లాదేశ్‌తో రెండు మ్యాచ్‌ల టెస్ట్‌ సిరీస్‌ ఆడనుంది. ఈ స్టార్‌ బ్యాటర్‌ ఇప్పటివరకు 96 టెస్ట్‌లు ఆడాడు.