Thursday, July 29, 2021

వైసీపీ నిరుద్యోగులకే ఉద్యోగాలు వచ్చాయి: నారా లోకేష్

ఇటీవల జగన్ సర్కారు విడుదల చేసిన జాబ్ క్యాలెండర్‌ను నిరసిస్తూ టీడీపీతో పాటు పలు విద్యార్థి సంఘాలు నిరసన కార్యక్రమాలను ఉద్ధృతం చేశాయి. తాడేపల్లిలోని జగన్ నివాసాన్ని ముట్టడించేందుకు ప్రయత్నించాయి. అయితే విద్యార్థుల ప్రయత్నాలను పోలీసులు అడ్డుకున్నారు. నిరసనకారులను అదుపులోకి తీసుకుని అక్కడి నుంచి తరలిస్తున్నారు. ఈ ఘటనపై టీడీపీ నేత, మాజీ మంత్రి నారా లోకేష్ మండిపడ్డారు.

వైసీపీ రాజకీయ నిరుద్యోగులకు ఉద్యోగాలు ఇచ్చారని, మరి రాష్ట్రంలోని నిరుద్యోగ యువతకు ఉద్యోగాలు ఎక్కడ జగన్ గారూ? అని ట్విట్టర్ వేదికగా లోకేష్ ప్రశ్నించారు. నిరుద్యోగుల ఉద్యమాన్ని నిర్బంధంతో అణచివేయలేరని అన్నారు. కొత్త జాబ్ క్యాలెండర్ విడుదల చేయాలని డిమాండ్ చేస్తూ, సీఎం ఇంటి ముట్టడి కార్యక్రమం సందర్భంగా మీ నిర్బంధాలకు, అక్రమ అరెస్టులకు ఎదురొడ్డి మరీ నిరసన తెలిపిన యువత ఉద్యమ స్ఫూర్తిని అభినందిస్తున్నానని తెలిపారు. ఏపీ ఉద్యోగ పోరాట సమితి ఉద్యమాన్ని ఉక్కుపాదంతో అణచివేస్తున్న కానిస్టేబుల్ నుంచి ఐపీఎస్ అధికారుల వరకు… సీఎం జగన్ మాదిరే ఆనాటి సీఎంలు ఉద్యోగాలను భర్తీ చేయకుంటే మీకు ఈరోజు ఉద్యోగాలు ఉండేవా? అని లోకేష్ ప్రశ్నించారు. ఈ విషయం గురించి పోలీసులు ఆలోచించాలని అన్నారు. ఉద్యోగ పోరాట సమితి న్యాయమైన డిమాండ్లను పరిష్కరించకపోతే రానున్న రోజుల్లో ఈ ఉద్యమం మహోద్యమంగా మారుతుందని లోకేష్ హెచ్చరించారు.

Advertisement

తాజా వార్తలు

Advertisement
Prabha News