జమ్మూ కాశ్మీర్ వరుస ఎన్‌కౌంటర్లతో అట్టుడుకుతోంది. తీవ్రవాదులకు, భద్రతా బలగాలకు మధ్య భీకర కాల్పులు చోటు చేసుకుంటున్నాయి. తాజాగా రాజౌరీ జిల్లాలో మరో ఎన్ కౌంటర్ చోటు చేసుకుంది. భద్రతా బలగాలు, టెర్రరిస్టుల మధ్య ఎదురుకాల్పులు చోటు చేసుకున్నాయి. ఈ ఘటనలో జూనియర్ కమిషన్డ్ ఆఫీసర్ ( జేసీఓ)తో పాటు నలుగురు జవాన్లు మొత్తంగా ఐదుగురు జవాన్లు వీరమరణం పొందారు. సోమవారం ఒకే రోజు మూడు ప్రాంతాల్లో ఎన్ కౌంటర్లు చోటు చేసుకున్నాయి.
అనంత్ నాగ్, బందీపోరాలో ఉదయం పోలీసులు, టెర్రరిస్టులకు మధ్య ఎన్ కౌంటర్ జరిగింది. ఈ ఘటనలో ఇద్దరు టెర్రరిస్టులను బలగాలు మట్టుపెట్టాయి. తాజాగా రాజౌరీలో ఎన్ కౌంటర్ చోటు చేసుకుంది. ఆప్గన్‌ను తాలిబన్లు చేజిక్కించుకున్న తరువాత నుంచి జమ్ము కాశ్మీర్లో తీవ్రవాదుల కదలికలు ఎక్కువయ్యాయి. మరోమారు భారత్ తో పెద్ద దాడి చేసేందుకు లష్కర్ ఏ తోయిబా, జైష్ ఏ మహ్మద్ వంటి ఉగ్రవాద సంస్థలు పథకాలు రచిస్తున్నాయి. అయితే భద్రతా బలగాలు మాత్రం ఎప్పటికప్పుడు ఉగ్రవాద కుట్రల్ని భగ్నం చేస్తున్నాయి.