మధ్యప్రదేశ్‌లోని సత్నా జిల్లాలో బలమైన గాలులు, భారీ వర్షాలతో భక్తులు ప్రయాణిస్తున్న రోప్‌వే ట్రాలీలు ఆగిపోయాయి. దీంతో మైహార్ కొండపై ఉన్న మా శారదా దేవి ఆలయాన్ని సందర్శిస్తున్న సుమారు 28 మంది భక్తులు గాలిలో చిక్కుకున్నారు. ఈ ఘ‌ట‌న‌లో ఏడు ట్రాలీలు, ఒక్కో దాంట్లో నలుగురు వ్యక్తులున్నారు. వీళ్లంతా దాదాపు 40 నిమిషాల పాటు గాలిలో ఊగుతూనే ఉన్నారు.
ఈ ప్రాంతంలో బలమైన గాలులు వీచే అవకాశం ఉన్నందున రోప్‌వే కార్యకలాపాలను మూసివేయాలని వాతావరణ శాఖ హెచ్చరించినప్పటికీ.. రోప్‌వే నిర్వహణ సేవలను ఆపలేద‌ని తెలుస్తోంది. అయితే.. ఆ త‌ర్వాత ట్రాలీలను కిందకు దించడంతో పెద్దగా ప్రమాదం జరగకుండా భక్తులందరినీ రక్షించారు. గత నెలలో జార్ఖండ్‌లోని డియోఘర్‌లో జరిగిన భారీ రోప్‌వే ప్రమాదంలో ముగ్గురు వ్యక్తులు చ‌నిపోయారు. మరియు పలువురు గాయపడ్డ విష‌యం తెలిసిందే..