వాడల వాడల వెంట వాడెవో వాడేవో
నీడ నుంచి చీరలమ్మే నేత బేహారి || వాడల వాడల వెంట ||
పంచ భూతములనెడి పలువన్నె నూలు
చంచలపు గంజివోసి చరిసేసి
కొంచెపు కండెల నూలి గుణముల నేసి
మంచి మంచి చీరలమ్మే మారు బేహారి || వాడల వాడల వెంట ||
మట మాయముల తన మగువ పసిడి నీరు
చిటిపొటి యలుకల జిలికించగా
కుటిలంపు జేతలు కుచ్చులుగా గట్టి
పట వాళి చీరలమ్మే బలు బేహారి || వాడల వాడల వెంట ||
మచ్చిక కర్మ మనేటి మైల సంతలోన
వెచ్చపు కర్మధనము వెలువ చేసి
పచ్చడాలుగా గుట్టి బలు వేంకటపతి
ఇచ్చ కొలదుల నమ్మే ఇంటి బేహారి || వాడల వాడల వెంట ||