ప్రముఖ బంగ్లాదేశ్ నటి రైమా ఇస్లాం షిము (46) దారుణ హత్యకు గురైంది. ఢాకా కెరానిగంజ్ లోని హజ్రత్పూర్ వంతెనకు సమీపంలో గోనె సంచిలో ఓ వ్యక్తి మృతదేహం కనిపించడంతో స్థానికులు పోలీసులకు సమాచారమిచ్చారు. దీంతో సంఘటనా స్థలానికి వచ్చిన పోలీసులు ఆ గోనె సంచిని పరిశీలించి, ఆ మృతదేహం సినీ నటి నటి రైమా ఇస్లాం షిముదని గుర్తించారు.
రైమా శరీరంపై కనిపించిన గాయాలను బట్టి రెండు రోజుల క్రితం ఆమెను హత్య చేసి ఇక్కడ పడేసి ఉంటారని భావించిన పోలీసులు ఆమె మృతదేహాన్ని పోస్ట్ మార్టంకు పంపించారు. గత మూడు రోజుల క్రితం రైమా ఇస్లాం షిము భర్త షెకావత్ అలీ, తన భార్య కనిపించడం లేదని పోలీసులకు ఫిర్యాదు చేశారు. అయితే రైమా మృతదేహం పరిశీలించాక ఆమె భర్తపై అనుమానం వచ్చి పోలీసులు విచారణ చేపట్టగా విస్తుపోయే నిజాలు బయటపడ్డాయి.
తన స్నేహితులతో కలిసి ఈ దారుణాననికి పాల్పడింది తానేనని రైమా భర్త షెకావత్ అలీ అంగీకరించినట్లు పోలీసులు తెలిపారు. ఇంట్లో గొడవల కారణంగా తన భార్యను హత్య చేసినట్లు ఒప్పుకున్నాడని అన్నారు. ప్రస్తుతం పోలీసుల అదుపులో ఉన్న షెకావత్ అలీ, ఆయన స్నేహితులపై లోతుగా విచారణ జరుగుతోంది. రైమా ఇస్లాం దాదాపు 25 చిత్రాల్లో నటించింది. అలాగే పలు టీవీ సీరియల్స్‌లో కూడా నటించింది.
లోక‌ల్ టు గ్లోబ‌ల్.. ప్రభన్యూస్ కోసంఫేస్‌బుక్‌, ట్విట‌ర్, టెలిగ్రామ్ పేజీల‌ను ఫాలో అవ్వండి..