విడుదలకు ఇంకా ఐదు రోజులు సమయం ఉన్నా టాలీవుడ్‌లో అప్పుడే ‘వకీల్ సాబ్’ మేనియా నెలకొంది. హైదరాబాద్ శిల్పకళావేదికలో ఆదివారం సాయంత్రం జరిగిన ‘వకీల్ సాబ్’ ప్రి రిలీజ్ ఈవెంట్‌లో పవర్ స్టార్ అభిమానులు సందడి చేశారు. పవన్ కోసం ఈ ఫంక్షన్‌కు భారీగా అభిమానులు తరలివచ్చారు. అయితే ఈ కార్యక్రమానికి పవన్ ఏ సమయానికి వస్తారన్నదానిపై స్పష్టత లేకపోవడంతో అభిమానులు పవర్ స్టార్ నినాదాలతో హోరెత్తించారు. ఈ నేపథ్యంలో అభిమానులను సంతోషసాగరంలో ముంచెత్తుతూ పవన్ కల్యాణ్ తన మిత్రుడు, ఆర్ట్ డైరెక్టర్ ఆనంద్ సాయితో కలిసి ఈవెంట్‌కు వచ్చారు. పవన్‌కు నిర్మాత దిల్ రాజు స్వాగతం పలికారు. కాగా పవన్ రాకతో కాసేపు శిల్పకళావేదిక అభిమానుల నినాదాలతో మార్మోగిపోయింది.
