భారతదేశం గర్వించేలా చేసిన విజ‌న‌రీ డైరెక్టర్ SS రాజమౌళి నెక్ట్స్ ప్రాజెక్ట్ పై భారీ అంచనాలున్నాయి. కాగా, టాలీవుడ్ సూపర్‌స్టార్ మహేష్ బాబుతో రాజమౌళి ఓ గ్లోబ్‌ట్రోటింగ్ మూవీ చేయనున్నట్టు ఇదివరకే ప్రకటించాడు. దర్శకుడి లాస్ట్ ప్రాజెక్ట్ RRR ప్రపంచవ్యాప్తంగా సంచలనంగా మారడంతో ఈ మూవీపై కూడా అభిమానుల్లో అంచనాలు భారీగా పెరిగాయి. తాజా సమాచారం ప్రకారం, ఈ భారీ బడ్జెట్ సినిమా ఈ ఏడాది జూన్ లో ప్రారంభం కానున్నట్టు తెలుస్తోంది.
ఈ మూవీ స్క్రిప్ట్‌ను అతి త్వరలో పూర్తి చేసి, రాజమౌళి ఈ కొత్త ప్రాజెక్ట్‌పై పూర్తిగా దృష్టి పెట్టనున్నారు. కాగా, ప్రస్తుతం మహేష్ బాబు త్రివిక్రమ్‌తో చేస్తున్న సినిమా పూర్తయిన తర్వాతే రాజమౌళి మూవీ రెగ్యులర్ షూటింగ్ ప్రారంభం కానుంది. ఇక త్రివిక్రమ్ తో చేస్తున్న మూవీ షూటింగ్ ప్రస్తుతం హైదరాబాద్‌లో జరుగుతోంది. రాజమౌళి-మహేష్ బాబు మెగా ప్రాజెక్ట్‌ను దుర్గా ఆర్ట్స్‌పై కెఎల్ నారాయణ నిర్మించనున్నారు. హీరోయిన్, ఇతర నటీనటులు, సాంకేతిక నిపుణుల వివరాలు రానున్న రోజుల్లో మేకర్స్ ప్రకటించనున్నారు.