ఏపీలో వైసీపీ అధికారంలోకి వచ్చాక మద్యం పాలసీ సిస్టమ్ మారిపోయింది. తాజాగా 2022-23 ఆర్థిక సంవత్సరానికి గాను రాష్ట్రంలోని బార్లకు కొత్త పాలసీ ప్రకటించింది ప్రభుత్వం. పట్టణ ప్రాంతాలు, మున్సిపల్ కార్పొరేషన్లు, నగర పంచాయతీల పరిధిలో ఎన్ని బార్లు ఉండాలన్నది ఎక్సైజ్ కమిషనర్ నిర్ణయిస్తారు.
ఇక.. మున్సిపల్ కార్పొరేషన్ లో 10 కిలోమీటర్ల పరిధిలో, మున్సిపాలిటీల్లో 3 కిలోమీటర్ల పరిధిలో బార్లు ఏర్పాటు చేసుకోవడానికి చాన్స్ కల్పించారు. ఇది మూడేళ్ల కాలపరిమితితో కొత్త బార్లకు లైసెన్సులు ఉండనున్నాయి. బార్లకు లైసెన్స్ ఫీజుతో పాటు నాన్ రిఫండబుల్ రిజిస్ట్రేషన్ చార్జీలు ఏడాదికి 10 శాతం పెంచింది ప్రభుత్వం. కాగా, కొత్త బార్ పాలసీ సెప్టెంబరు 1 నుంచి అమల్లోకి రానుంది.
ఈ మేరకు రెవెన్యూ శాఖ ప్రత్యేక ప్రధాన కార్యదర్శి రజత్ భార్గవ ఉత్తర్వులు వెలువరించారు. ప్రస్తుతం ఉన్న బార్ల లైసెన్సులను మరో రెండు నెలల పాటు పొడిగించారు. వాస్తవానికి బార్ల లైసెన్సులు ఈ నెలాఖరుతో ముగియనున్నాయి. తాజా ఉత్తర్వుల నేపథ్యంలో, బార్ల లైసెన్సుల కాలపరిమితి జులై 1 నుంచి ఆగస్టు 31 వరకు పొడిగించారు. లైసెన్సులు పొడిగించిన కాలానికి ప్రభుత్వం ఈ నెల 27న బార్ల నుంచి ఫీజులు వసూలు చేయనుంది.